Kamis, 18 Juni 2020
Tabik pun disini saya ingin sedikit berbagi segata atau pantun tentang cinta dalam bahasa lampung nah buat kamu yang ingin buat status di facebook atau caption di instagram menggunakan segata bisa lihat disini contohnya, bahasa lampung dang sampai lupa kyay berikut pattun dari attu Mardalena Lena
Kukhiap anjak tingkat
Nyepok kelahikhanku
Bulikut kulliak mawat
Kukhuk miwang nyak mekhu
Kundangmu khua telu
Wat sayang tebelunju
Kik nyak singkikh andahmu
Wat kodo sai ngedaku
Hanggumku lawan niku
Mak ngekhinganan lagi
Najin wat khua telu
Niku pilihan hati
Tiap khani putungga
Ngessai di khasa khasa
Anganonni mak lupa
Tiap waktu tidipa
Kik cawa dunia maya
Dangtakukko di hati
Segata lamon maknyata
Foto lamon mak asli
Dang pandai kidah cawa
Makpandai ngejalani
Gumintar di segata
Bang mapar isi dikhi
Lamon jamma si jakhu
Lamon sai toko adat
Lamon jamma builmu
Lamon jamma bupangkat
Sekhakkung nyebkhang gunung
Pumatang nanjak teba
Niku sikhok ni lukkung
Penggattungan ni nyawa
Mati malangmu badan
Pukhat mak mingan lippuh
Tittok di penapian
Tipisah di penglasuh
Angon mak salah anggak
Bukaca nyak didikhi
Nyak batang khaddak bukhak
Mak ngancam batang jati
Bugindam niku pelus
Nutukan hili ni wai
Wai bekhak nanjak hakhus
Kuk iman ku tekacai
Hakhus matoh ko helu
Selom selusukh jukhak
Demon ku jama niku
Wai hakhus moloh dunggak
Mandi di wai sekiman
Sabun luh kutembidi
Payahnyak netop iman
Niku penggoda hati
Pangliak ku mak tiwas
Penengis ku diniku
Sappai nyawaku khaddas
Demon sayang ku diku
Khadu biak kubaban
Hukhik dillom lamunan
Mengan nyippok tenggalan
Mikikh kon di hayungan
Kuk tullan ku mu lemmoh
Nemon hukhik sengsakha
Jo nyak tekaccong jaoh
Nemonnyak bukakikha
Api khusia ni tuhan
Hukhik lamon dekhita
Kalau senang di depan
Ninggalko hukhik saka
Sekhukuk dakhak pasuk
Tinjauwan kham jak pekon
Nipukuk anttak banguk
Nibuang angon angon
Kik kham khadu bulangkah
Ti uyunko lapahan
Kantu matoh di tengah
Lapahan jadi tumban
Dang lidak liduk sanak
No kaci di bah lamban
Akuk candung tikol nyak
Hin hati mu mupappan
Bukaca di halinu
Umbak mattos di heni
Buyu mawak ngedako
Di khanja jajau hati
Petakh cina makngisi
Jekhing ngalih di kuau
Khekhanja jajau hati
Hati layau tejajau
Hitung tebakan manggis
Garis angka di hulu
Wai ba al kucaccas mis
Sorotan di pudak ku
Keminan nanom cekkokh
Nanom di pinggikh somokh
Najin dunia hancokh
Kubedak sampai kobokh
Tekhai labung mukiwakh
Khik bakhong labung angin
Pak gunung jadi dattakh
Mak cinta ku ki balin
Lamon ni pekhing kawokh
Kawokh ni pekhing kuning
Bacak hancokh jak mondokh
Jak mak temu kegekhing
Dadani cucukh mundukh
Sekhabi kukhang gula
Najin dunia haccukh
Mak bakal ninggal ko ya
Kubilang bilang bintang
Sekhibu liyu pitu
Kubilang bilang kundang
Bacak sai sampai niku
Kelapa hujau hiyau
Nisiakh matakhani
Mukhanai hellau hiyau
Guai khebutan mulli
Bulu kening mu khuccing
Kalobok khua taok
Mulli lamon sai gekhing
Janda lamon sai tekhok
Mulamon sai jak kota
Lamon munih jak huma
Cinta ni mak tekhima
Ya mulai nyella wada
Kipas mas kipas pulas
Kipas bulung tembaku
Sappai nyawaku tiwas
Cinta sayangku diku
Mati pusuluh jambu
Di alahko kakebang
Mati sedih dikhiku
Ninggalko kasih sayang
Lamon ni buah kayu
Dibah ni batang khubbing
Nyak khadu demon diku
Bang dikhi di pubanding
Lain nyak sai mak sayang
Astawa mawat cinta
Niku mulamon kundang
Ngukha pu hellau nana
Selamat tinggal sayang
Nyak lapak khik bulangkah
Ninggalko hati sayang
Ulih mawat se akhah
Wai lima kuta jawa
Palembang sungai musi
Kawin karena cinta
Harta di ujung jari
Mejong hadap masjid
Nyenuk pudak di kiam
Demon ku nyat nyelenyit
Kidang hati ku liam
Haha hana ni kayu
Kayu jelatong kebau
Hana hana ni niku
Si nyani badan ganyau
Niku panjak jak mata
Bawak mu sahuk matang
Hellau nihan di wangga
Senyum manis kak lalang